Carlos Tena well väarewajch

Carlos Tena es dee nieja President von Cuauhtemoc, un hee sajcht, Cuauhtemoc woat unja siene Rejierung väarewajch kumen. Hee gleijcht daut nijch, wann bloß von Sachen jeredt woaren uba kjeena deit waut doamet.
Daut fehlt seeja needijch aun Bosvekjia von Cuauhtemoc derch dee Manitoba Kolonie bat Rubio. Väle Oabeida un uck väle aundre Menschen wudden met ne Bos kjennen no de Kolonie kumen, ohne det äjne Foatijch motten han. Noch dit Joa well hee daut em gonen han met den Bosvekjia.
Met dem Niebu, oda deet breeda moaken von dem Corredor Comercial Manitoba kjemmt daut schienboa uck nijch wieda. Tena sajcht, wann dee Rejierung von Chihuahua nijch no dee Bürja von dee Kolonie hieren woat, dann nemmt hee det Projekt no Mexiko Staudt un stalt daut doa väa, uba dee Heiway mot nie un breeda jemoakt woaren.
Aun Predial tolen kjikjt hee aus ne Mäajlichkjeit naun, meeja too doonen. Wann meeja Predial jetolt woat, wudd uck meeja jedonen woaren. Fa jieda Peso waut Predial jetolt woat, jeft dee estatale uck federale Rejierung jieda een Peso. Wann 13 Millionen Pesos Predial jetolt woat, kjrijcht de Rejierung 13 Millionen vom Estado un 13 von dee federale Rejierung, aules toop 39 Millionen, un wann meeja Predial jetolt woat, es daut kjrajt doano meeja.
Carlos Tena well sikj eenmol em Monat met de Birja ut de Kolonie trafen, om too plonen, waut aules too doonen fehlt.
Waut Carlos Tena vesprakjt, es daut hee woat opp paußen, daut det Jeld rajcht jebruckt woaren woat.

Marcar el enlace permanente.

Comentarios cerrados.