Dee Dicken Sestren moaken sikj fa dee nationale Tonnenreessen reed

Em Somma sellen dee nationale Barriles Reesen stautfinjen un dee baste Mejalles, dee Barrileras, enn disse Reesen kjennen doa metmoaken.
Mathilda Dyck un äara Sesta Adelia wellen doabie sennen. See hant aul joarelang enn dee Carreras de Barriles opp veschiedne Städen met jemoakt, un see sent äwadem aul vedollt goot jeworden, det Pieet rom dee Tonnen too lenkjen un too dee rechtje Tiet ensaten too loten, om den Rees en dee kjartste Tiet too rannen.
Om too bewiesen, daut see goot jenuach fe dee nationale Tonnenreessen sent, motten see sikj ieescht mol aun dee Selectiva vom 1. bat 3. Feebiwoa enn Chihuahua bedeeljen. Blooß doa es een Hoaken. See reesen nijch mett äa äjnet Pieet. Jieda Deelnehma nemmt en Riedpieet met, und dart woat dann jrots ver dem Rees jesajcht, woone Mejall met woon Pieet reesen deit. Doa wiest sikj daut rut, wäa werkjlich festeit, daut Pieet too lenkjen.
Matilda un Adelia sent aul seeja jespaunt, woo see doonen woaren un hant daut volle Vetruen, daut see dann em Somma no dee „Nacionales“ foaren woaren. Sikj aun soone „Nacionales“ too bedeeljen kjemmt dia, wielst see wudden dee lange Reis motten moaken. Dee Foat es miere Doag. Dee Pieed motten see metnehmen un daut Lewen selfst betolen. Uba wann daut sowiet es, jleewen dee Dycken Sestren, woat sikj aul en Wajch updoonen, daut see sikj dee Reis woaren leisten kjennen.

Hia sent Matilda und Adelia Dyck opp äare Pieed bei eenen Tonnenrees (Carrera de Barriles). See rieden doa romm, omm äare Pieed reed fa den Rees too han. Emm Somma wellen see no dee Nacionales, wua de baste ut gaunz Mexiko sikj bedeeljen kjennen. Foto: Mathilda Dyck
Marcar el enlace permanente.

Comentarios cerrados.