Dee Malkj es too billich

Ne Grupp von onjefäa 150 Malkjfoarma protestied ver twee Wäakj ver den Rejierungspalast en Chihuahua. See hauden doa uck miere Kjäj. En poa von dee Kjäj mussten noch räajelmäßig jemolken woaren.
Andres Valles eena von dee Manna waut den Protest aunstald, säd wuarom see daut deeden. Liconsa, waut emma väl Malkj kjaft, toold fief Joa trij aul krajt soo väl fa de Malkj aus nu, 6.10 Pesos det Lita. Uba en disse fief Joa sent dee Onkosten seeja jestäajen. Een Lita Malkj too produzieren kost 7.50 Pesos, wann maun aule Onkosten met nenn räatjend, so aus Fooda, Medizin, Fia, den Staul unjahoolen en aundret.
Dee Pries, den waut Liconsa tolt, woat von dee Rejierung von Mexiko jesat, nijch von dee Rejierung en Chihuahua. Uba Valles säd, daut see von dee Rejierung von Chihuahua valangen, met den Pries too halpen.
Dee Rejierung von Chihuahua haft vasproaken, met dee Malkjfoarma toop no Mexiko Staud too foaren, om dart met dee Rejierungmanna äwa den Malkjpries too vahaundlen.
Dee Malkjpries en miere Kjeesfabrikjen es nu 7.00 Pesos en 7.10 Pesos det Kilo. Uba woarschienlich woat dee Pris bold raufgonen. Daut es, aus wann dee Malkj utgangs Winta bat Somma en bät weinja Kjees jeft.
Wann Liconsa wudd noppgonen met äaren Pries, wudd dee Kjeespries doawäajens nijch stiejen, uba dee Kjeesfabrikjen wudden dee Malkj, waut see nijch too Kjees faobeiden, fa en diereren Pries fakjeepen kjennen, un see wudden nijch met den Pries so wiet raufkumen brucken.

Marcar el Enlace permanente.

Comentarios cerrados.