Dee Sabinal Kolonie kjaft Laund en Campeche

Aul Joare lang haft dee Sabinal Kolonie von Chihuahua no Laund fa äare Birja jesocht. Dee Laundhaundel, waut see Joaren trij en Quintana Roo muaken jinj scheef. (Loota en bät meeja doatoo.)
Nu hant see een Flekj Laund en Campeche jefungen, waut äant interessiet. Daut sent äwa 7000 Hekta. Waut von daut Laund es utjeroot, uba en grootet Poat es noch Woold un Bosch. Ver en poa Wäakj fuhren atelje Manna, so aus Vuasteeja un Ohms wada doahan, daut Laund too besechtjen.
De Fakjeepa haft fasproaken, sikj om en jewesset utroden too kjemren. Doch hee well han, daut saul ruhig bliewen. Dee Siedla sellen „dee Stellen am Laund“ sennen. Wann niejet Laund upjemoakt woat, jeft daut emma Gruppen, waut vesäkjen, doa mang too spälen, besondasch soone Gruppen waut jleewen, doa sull kjeen Bosch und Woold utjerot. Doawäajens es daut bäta, wann doa nijch too väl Jeluts von jemoakt woat.
En Quintana Roo wia daut atelje Joaren krakjt soo. Doa wieren woll mau weinje Oabeida opp dem Laund, doch seeja väl Nieschieje fuaren doahan bloß om daut Laund too beseenen. Menschen ut dee Jäajend fruagen sikj, waut doa aunjinj. Natuaschutzgruppen worden oppmoakjsaum un boold fuaren see von dee Rejierung doahan. Waut dann passied, es bekaunt. Atelje Ministe worden sogoa faustjenumen.
Dit Laund en Campeche es schienboa nijch soon Laund waut unja soonen Schutz steit, uba om aules jleij too hoolen, sull dort nijch too en grootet Jeluts jemoakt woaren.
Fa dee Sabinal Kolonie es daut seeja wijchtig, meeja Laund too finjen, besondasch Laund, wua maun nijch iescht dia einrejchten mott, soo aus daut bei eene Wässarie dee Faul es. En Campeche es daut Räajenfaul. Dee Bua bruckt bloß soo väl Laund reeden aus hee well, un nijcht iescht eenen grooten Borrem moaken.
Butadem es nu noch dee Aunjeläajenheit von Elektrizität (Fia) un Veändrungen en Sabinal. Doa sent soone, waut daut wellen, aundre uba muchten daut leewa nijch. En Sabinal kjemmt det Pompen ohne Fia väl too dia. Doa mott Fia sennen. Uba enn Campeche sull daut mäajlich sennen one Fia en Lewen to moaken.

Marcar el Enlace permanente.

Comentarios cerrados.