Fehren Breeda worden schwoa velatzt

Ne Grupp von sass Jungs fueren aum Sindach, den 21. Juli met ne Jetta Koa den Huachwach delenj. Daut haud en bät jeräajent, un opp den Wach wieeren waut Puddels. Wiels see zimlich stoakj fueren, brocht een Puddel äant ut Kontroll. See jeroden no de aundre Sied vom Huechwach, uba toom Jlekj kjeem doa kjeen Foatich. Doch dann fueren see aune Brij naun, schooten äwa, un wiels see nich aunjeschnalt wieeren, schliesaden Fehren Johnny un Hein rut.
Disse beid Junges worden seeja schwoa velatzt. Hein wia besondasch aum Rijen un Krjietz velatzt. Hee word doaraun operieet, uba dee Doktasch kunen daut nich oppfixen. Bot den dreden August wia hee em Krankenhüs. Daut scheen to bätren met am uba aum dreden August storf hee.
Johnny word seeja aum Kopp velatzt. Dee Vestaund schwoll seeja opp. Am muss en Stekjskje Knoaken ut dem Kopp jenumen woaren, un veloa uck een Uag. Hee word en Cuauhtemoc em Krankenhüs behaundelt, dann brochten see ham nu Chihuahua. Sien Toostaund bleew uba kritisch. Hee storf aum 1. August.
Dee Metfoada, Isaak Ennsen un Heinrich Peters äare Junges worden meist nuscht velatzt en dem Accident.
Johan Fehren wohnen en Campo 115. Dee Junges hauden en poa Wäakj eeja aul eenen Onfaul, wuabie see een Foatich aul gaunz veknutschten, uba äant nuscht word.
Ver 10 Joa vedrunkt eent von Fehr siene Junges (en 14 joascha) en eenen Puddel bie Campo 115. (Johan Fehr wia toom tweeden Mul befriet. Dee Mame von disse Junges wia Justina Giesbrecht. Nü wia Fehr met Judith Knalsen befriet.
Hein, dee Foara, haft en Ella von 17 Joa un 6 Moonat in Johnny wia 13 Joa, 5 Moonat in 11 Doag.

Marcar el enlace permanente.

Comentarios cerrados.