Toofräd met dem 1. Kultuadach

Em Moatz word dee Rejierung sikj eenich eenen Kultuadach fa de Mennoniten auntoostalen, un aum 21. Aprell word dee uck aul derjefiet. Trotzdem doa mau weinijch Tiet fa plonen jejeft word, wieren dee Rejierungsoabeida seeja tofräd met den Dach. Aules toop bedeeljden sikj bei 600 Menschen aun dem Kultuadach.
Woo rand dee Dach auf? En bät no clock alf wia dee Äaröffnung. Museumsvawaulta Tony Loewen jeef eenen Äwablekj von Mennoniten un dee Plautdietsche Sproak. Radiomaun Bram Siemens äarkjläd en bät dee Schwierichkjeit, eene Sproak too reden, det Plautdietsche, un ne aundre Sproak too schriewen, det Huachdietsche.
No dee Äaröffnung worden jemolde Bilda un Haundoabeiden jewesen, waut extra utjestalt wieren.
Dann nom Meddach äten wieren doa dree Gruppen, waut faschiedene Leeda sungen, mieschtens opp Plautdietsch. Tony Loewen un Bram Siemens räden noch äwa dee Häakunft von dee plautdietsche Sproak. Daut Wuat „Plaut“ word too jane Tiet, bei 600 Joa trij schienboa jebruckt aus waut vestaändlichet. Daut wia en Jäajendeel too ne huachbeensche, jeliede Sproak, ne Sproak, waut Menschen vestunden. Un daut es Plautdietsch vondoag noch emma fa miere Hundatdüsent Mennoniten, dee Sproak, waut see vestonen.

Marcar el Enlace permanente.

No se admiten más comentarios