Vebodnet Strohverbrennen saul dia bestroft woaren

Jieda Joa woat Stroh vebrennt, uba daut saul jieda Joa weinja woaren, velangt dee Rejierung.

Jieda Hoafst woat väl Stroh vebrennt, un väle Menschen es dit emm Stijch. Jieda Joa woat von dee Rejierung en Druck utjeeft, daut doa weinja Stroh saul vebrennt woaren. Woo sit daut dit Joa doamet ut?
Dee nieja Präsident von Cuauhtemoc well doa ne Ordnung han. Hee haft aul Unjahoolungen met dee Vorsteher jehaut. Hee aunerkjannt, daut doa de latzte poa Joa ne jewesse Ordnung enjehoolen worden es, uba hee well han, daut trotz dee Ordnung weinja Stroh vebrennt woaren saul. Doa es en Druck von dee Rejierung ut Mexiko, daut em gaunzen Laund weinja vebrent woaren saul. Doa es too väl Ruak enne Loft. Det Wada en de gaunze Welt woat woama, un Wissenschauftla sent sikj äwazeicht, dau dit doahäa kjemmt, daut doa so väl Ruak en de Loft nennkjemmt. Ruak von Foatia, Fabrikjen, Jets, un uck von Stroh un Holt vebrennen drajcht doatoo bie.
Dit Joa woat woarschienlijch meeja Stroh enjeprasst woaren, wielst daut aun meej Fooda fehlt. Uba Tena wenscht, daut butadem noch weinja Stroh vebrennt woaren woat.
Doa saul wada ne Ordnung sennen, wäa aun woonen Dach vebrennen doaf. Wann jemaund aun en Dach vebrennt, wua hee nijcht en Permiso fäa haft, dee saul dia Struf tolen. Doa mott ne Ordnung sennen, Väaschreften motten enjehoolen woaren, sajcht Tena.
Dee Rejierung well disse Ordnung toop met dee Vorsteher plonen, uba dee Rejierung well doanoo kjikjen, daut det Berädne einjehoolen woat.

Marcar el enlace permanente.

Comentarios cerrados.