Wooväl Mennoniten jeft daut enne Welt

Dee Zool von de Mennoniten enne Welt woat stendig jrata. Toojoa em Novamba word dee Metjliedzool opp 2,131,000 jestald. Daut sent Mennoniten, waut bei Jemeent sent, oone de Kjinja un Jugendliche too talen, waut nijch jetauft sent.
Dee mieeschte Mennoniten wonen ene Stets. Doa läwen en bät äwa 500 000 Mennoniten. De mieeschte Mennoniten enne Stets sent von dietsche Aufstauminj. Uba doa sent uck väle Menschen von mennonitischem Hinjagrund waut no nicht-mennonitiche Kjoaken gonen.
Dee Lenda met de näakjst mieeschte Mennoniten sent Lenda, wua meist kjeene Mennoniten wonen, waut von dietsche Aufstauminj sent. Mennonitische Missionoaren hant doa jeprädicht un Menschen hant den Gloowen aunjenumen. Disse hant dann de Gloowen wieda jesajcht, un fondoag sent doa seeja väle Menschen waut em Gloowen sent un too mennonitische Kjoaken jehieeren.
Toom Biespel en Äthiopien, Afrika, sent 311 000. En Indien, Asien, sent 257 000. En Kongo, Afrika, lewen 226 000 (Kongo es det Nubalaund von Angola). En Kanada sent en jieda Laund en bät äwa 33 000 Mennoniten (waut bei Jemeent sent).
Wann no Kontinente jekjikjt woat, haft Afrika det mieeschte Mennoniten met 777 000 Metjlieda. De mieeschte Mennoniten sent en Äthiopien, Kongo, Uganda, Zimbabwe, Angola und aundre. En Afrika sent nu 5 Prozent meeja Mennoniten aus ver veeja Joa.
En Nuedamerika (Stets, Kanada) sent 650,000. Dee Zool von Menschen, waut too mennonitische Kjoakjen jehieet, es hia en dee latste veeja Joa fief Prozent weinja jeworden.
Aun dredde Städ es Asien met 439,000 Mennoniten. Daut es twee Prozent meeja aus ver veeja Joa.
En Latein Amerika (Mexiko, Kolumbien, Bolivien, Paraguay, un aundre) sent daut nu een Prozent meeja aus ver veeja Joa. Doa sent nu 203,000 jedeepte Mennoniten. En disse Lenda sent uba uck väl Mennoniten waut nich von dietschen Hinjagrund sent. Daut jeft väl spaunische Kjoaken waut von mennonitische Prädjasch aunjefongen worden sent.

Marcar el enlace permanente.

Comentarios cerrados.